History of School

શ્રી સ્વામિનારાયણ શિક્ષણ સેવા કેન્દ્ર, સલવાવની સ્થાપના પૂ. પુરાણી સ્વામી કેશવચરણ દાસજીએ ૧૯૮૩ માં વલસાડ જીલ્લાના તત્કાલીન પારડી તાલુકાના ( હાલ વાપી તાલુકો)ના ગ્રામ્ય કસબો એવા સલવાવ ગામ મધ્યેથી પસાર થતા રાષ્ટ્રીય ધોરીમાર્ગ નં ૮ (હવે નં. ૪૮ ) લાગુ ૮ એકર જમીન ખરીદી શિક્ષણની ધૂણી ધખાવી.

સાવ બંજળ જમીન, ચડતી ઉતરતી ભોં, ઝાડી ઝાંખરામાં રાત્રીના શિયાળો ભોંકે, કોઈ દિવસે પણ આવતા ડરે આવા સ્થાને વિશાળ અને દેશ દુનિયાનું ધ્યાન ખેંચે એવી કીર્તિમાન સંસ્થાનું ભવ્ય સંકુલ હશે એવી તો કલ્પના પણ જોજન દુર જણાતી.

પરંતુ દ્રઢ મનોબળ અને સંકલ્પ ધરાવતા સંત માટે વેરાનને વૃંદાવનમાં પરિવર્તિત કરવું અશક્ય ક્યાં હોય છે. સમાજને શિક્ષણ આપવાનું કાર્ય તો સરકારના શિરે હતું પરંતુ સંસ્કાર યુક્ત શિક્ષણની કેડી કંડારવા માટે સંતે બીડું ઝડપ્યું, સંતનું કાર્ય ભગવત ભજન અને માળા હાથમાં રાખી સત્સંગ કર્યા રાખવા પુરતું સિમિત નથી, પરંતુ આ બધી પ્રવૃત્તિ સાથે પાયાના શિક્ષણમાં સંસ્કાર સિંચી સંસ્કાર યુક્ત પેઢીનું નિર્માણ કરી એક એવો સમાજ ઉભો કરવો જે પરિવાર ભાવના, સામજિક ચેતના અને રાષ્ટ્ર નિર્માણના કાર્ય માટે તત્પર હોય. આવા સંકલ્પ ધારી સંતે ઝુપડીથી શરૂઆત કરી ગુજરાતી માધ્યમના ધો. ૫ ના વર્ગની સને ૧૯૮૫ માં ગુજરાત સરકાર પાસે માન્યતા મેળવી શિક્ષણનો પાયો નાખ્યો. આજે આ સંસ્થામાં કે.જી. થી લઇ પી.જી. સુધીનું શિક્ષણ અપાઈ રહ્યું છે. અહી શિક્ષણ મેળવનાર વિદ્યાર્થીઓ દેશ -વિદેશમાં પોતાના જ્ઞાનનો ડંકો વગાડી રહયા છે. તબીબી ક્ષેત્ર હોય કે વાણિજય ક્ષેત્ર હોય, શિક્ષણ ક્ષેત્ર હોય કે ન્યાય ક્ષેત્ર કે પછી રાજકીય ક્ષેત્ર હોય આવા તમામ ક્ષેત્રોમાં આ સંસ્થામાંથી શિક્ષણ મેળવનાર પોતાનો ઓજસ પાથરી રહ્યા છે.

જુન ૧૯૮૬ માં ધો. ૪ તથા ધો. ૬ ના ગુજરાતી માધ્યમના વર્ગની સરકારશ્રી પાસેથી મંજુરી મેળવી તેજ રીતે જુન ૧૯૮૭ માં ધો. ૩ અને ધો. ૭ અને જુન ૧૯૯૨ સુધીમાં શ્રી ઘનશ્યામ વિદ્યામંદિર પ્રાથમિક શાળા ગુરુકુળ પરંપરા અને હોસ્ટેલ વ્યવસ્થા સાથે જીલ્લાની એક મોખરાની સંસ્થા તરીકે ઉભરી આવી.

વિશેષ સિદ્ધિ